بچپن
سید علی حسینی خامنہ ای، مرحوم حجۃ الاسلام والمسلمین حاج سید جواد حسینی خامنہ ای کے فرزند، 28 صفر 1358 هجری(19 اپریل 1939) شہرِ مقدس مشہد میں پیدا ہوئے۔ وہ خاندان کے دوسرے فرزند تھے۔
مرحوم سید جواد خامنہ ای کی زندگی، بہت سے علماء کی طرح، نہایت سادہ اور زاہدانہ تھی۔ آیت اللہ خامنہ ای اپنی زندگی کے اُن دنوں کو یاد کرتے ہوئے فرماتے ہیں:
“میرے والد، ایک معروف دینی شخصیت ہونے کے باوجود، نہایت سادہ زندگی گزارتے تھے۔ ہماری زندگی بہت سخت تھی۔ مجھے یاد ہے کہ بعض اوقات رات کے کھانے کے لیے ہمارے پاس صرف روٹی اور کشمش ہوتی تھی، جسے ہماری والدہ کسی نہ کسی طرح مہیا کرتیں۔”
جس گھر میں یہ خاندان رہتا تھا، وہ ایک غریب محلے میں واقع تھا:
“ہمارا گھر تقریباً پینسٹھ مربع میٹر پر مشتمل تھا، جس میں ایک ہی کمرہ اور ایک تاریک تہہ خانہ تھا۔ جب کبھی لوگ میرے والد سے دینی یا سماجی مسائل کے سلسلے میں ملنے آتے، تو خاندان کو تہہ خانے میں جانا پڑتا تھا تاکہ ملاقات مکمل ہو سکے۔ بعد میں کچھ نیک دل افراد نے ہمارے گھر کے ساتھ والی خالی زمین خرید لی، جس سے ہم دو مزید کمرے تعمیر کرنے کے قابل ہوئے۔”
والد
ان کے والد، آیت اللہ سید جواد حسینی خامنہ ای، 7 دسمبر 1895ء مطابق 20 جمادی الثانی 1313 ہجری قمری کو نجف اشرف میں پیدا ہوئے اور 5 جولائی 1986ء کو وفات پا گئے۔ وہ اپنے زمانے کے ممتاز علماء اور مجتہدین میں شمار ہوتے تھے جو بعد میں اپنے خاندان کے ہمراہ تبریز منتقل ہوگئے۔
سطح کی تعلیم مکمل کرنے کے بعد سنہ 1918ء میں مشہد مقدس ہجرت کی۔ فقہ و اصول میں انہوں نے حاج آقا حسین قمی، مرزا محمد آقازادہ خراسانی المعروف بہ “کفائی”، مرزا مہدی اصفہانی اور حاج فاضل خراسانی جیسے جلیل القدر اساتذہ سے کسبِ فیض کیا۔فلسفہ کے میدان میں آقا بزرگ حکیم مشہدی اور شیخ اسد اللہ یزدی سے تعلیم حاصل کی۔
بعد ازاں سنہ 1927ء میں نجف اشرف گئے، جہاں انہوں نے مرزا محمد حسین نائینی، سید ابوالحسن اصفہانی اور آقا ضیاء الدین عراقی کے دروس سے استفادہ کیا۔ انہی عظیم شخصیات نے انہیں اجتہاد کی اجازت بھی عطا کی۔
پھر انہوں نے ایران واپس آنے کا فیصلہ کیا اور مشہد مقدس میں سکونت اختیار کی، جہاں زندگی کے آخری ایام تک مقیم رہے۔ تدریس کے ساتھ ساتھ انہیں مشہد بازار کی مسجد صدیقیها (جو آذربائیجانیوں کی مسجد کے نام سے بھی معروف تھی) میں امامتِ جماعت کی ذمہ داری سونپی گئی۔ وہ مسجد گوہرشاد کے ائمہ جماعت میں بھی شامل تھے۔
وہ مطالعے اور تحقیق کے بے حد شوقین تھے۔ ان کے علمی رفقاء میں حاج مرزا حسین آبائی، حاج سید علی اکبر خوئی، حاج مرزا حبیب ملکی اور دیگر ممتاز اہلِ علم شامل تھے، جن کے ساتھ برسوں علمی مباحث اور تحقیقات جاری رہیں۔ وہ نہایت متقی، دنیاوی امور سے بے نیاز اور زاہدانہ زندگی گزارنے والے انسان تھے۔
اسلامی انقلاب کی کامیابی کے بعد بھی انہوں نے اپنی سادہ اور زاہدانہ زندگی کو برقرار رکھا، حالانکہ ان کے فرزند اعلیٰ سیاسی اور انتظامی عہدوں پر فائز تھے۔ اپنی اعلیٰ انسانی صفات کے باعث وہ ہمیشہ عوام کے اعتماد کا مرکز رہے۔ انہیں روضۂ مبارک امام رضا علیہ السلام کے ضریحِ مقدس کے عقب میں واقع ایک رواق میں سپردِ خاک کیا گیا۔
امام خمینیؒ نے آیت اللہ خامنہ ای کے نام اپنے تعزیتی پیغام میں، آیت اللہ سید جواد خامنہ ای کو ایک “متقی اور متعہد عالمِ دین” قرار دیا تھا۔
والده
خانم خدیجہ میردامادی 1914ء میں پیدا ہوئیں اور 1989ء میں ان کی وفات هوئی۔ وہ نہایت متقی، دیندار اور باعلم خاتون تھیں، جنہیں قرآنی آیات، احادیث، تاریخ اور ادب سے گہری واقفیت حاصل تھی۔ انہوں نے اپنے بچوں، خصوصاً آیت اللہ سید علی خامنہ ای، کا پہلوی حکومت کے خلاف انقلابی سرگرمیوں میں بھرپور ساتھ دیا۔
آیت اللہ خامنہ ای اپنی والدہ کے بارے میں فرماتے ہیں:
“میری والدہ نہایت دانا، تعلیم یافتہ اور بامطالعہ خاتون تھیں، جنہیں شاعری اور فنونِ لطیفہ سے بھی دلچسپی تھی۔ وہ حافظ شیرازی کے کلام سے اچھی طرح آشنا تھیں۔ البتہ اس سے میری مراد یہ نہیں کہ وہ حافظ کی ماہر تھیں، بلکہ وہ ان کے اشعار کا شوق سے مطالعہ کرتی تھیں۔ انہیں قرآنِ مجید سے مکمل انس تھا اور ان کی آواز نہایت شیریں اور دلنشین تھی۔”
وہ مزید فرماتے ہیں:
“جب ہم بچے تھے تو ہم سب اپنی والدہ کے گرد بیٹھ جاتے اور وہ ہمیں قرآنِ مجید پڑھ کر سناتیں۔ ان کی تلاوت نہایت خوبصورت اور پرسوز ہوتی تھی۔ مختلف مواقع پر وہ انبیائے کرام علیہم السلام کی زندگیوں سے متعلق آیات کی تلاوت کرتیں۔ حضرت موسیٰ ، حضرت ابراہیم اور دیگر انبیاء کی زندگی کے بارے میں میں نے سب سے پہلے اپنی والدہ ہی سے سنا۔ جب بھی وہ قرآنِ مجید کی تلاوت کرتیں اور انبیاء کے نام آتے تو وہ ہمیں ان کے بارے میں تفصیل سے سمجھاتیں۔”
ابتدائی تعلیم
سید علی خامنہ ای نے چار برس کی عمر میں اپنی تعلیم کا آغاز کیا۔ انہیں مکتب بھیجا گیا جہاں انہوں نے قرآنِ مجید کی تعلیم حاصل کرنا شروع کی۔ ابتدائی تعلیم کے لیے انہوں نے مشہد کے پہلے اسلامی مدرسے “دارالتعلیم دیانتی” میں داخلہ لیا۔ اسی دوران انہوں نے مشہد کے متعدد قرّاء سے قرآنِ مجید کی تلاوت اور قرأت بھی سیکھی۔
ثانوی تعلیم
جب وہ چھٹی جماعت میں تھے تو انہوں نے ابتدائی حوزوی تعلیم کا آغاز کیا۔ دینی علوم سے ان کی گہری دلچسپی اور والدین کی حوصلہ افزائی نے ابتدائی تعلیم مکمل کرنے کے بعد انہیں اس علمی دنیا میں داخل ہونے پر آمادہ کیا۔ انہوں نے اپنی دینی تعلیم کا سلسلہ مدرسۂ علمیہ سلیمان خان میں جاری رکھا، جبکہ بعض ابتدائی دروس اپنے والد محترم سے بھی حاصل کیے۔
بعد ازاں وہ مدرسۂ نواب میں داخل ہوئے جہاں انہوں نے سطح کی تعلیم مکمل کی۔ اسی کے ساتھ ساتھ وہ اسکول کی تعلیم بھی جاری رکھے ہوئے تھے اور ہائی اسکول کی تک اپنی عصری تعلیم حاصل کی۔
حوزه علمیه مشهد
انہوں نے “معالم الاصول” آیت اللہ سید جلیل حسینی سیستانی سے اور “شرحِ لمعہ” اپنے والد محترم اور مرزا احمد مدرس یزدی سے پڑھی۔ اسی طرح “رسائل”، “مکاسب” اور “کفایہ” کی تعلیم اپنے والد اور آیت اللہ حاج شیخ ہاشم قزوینی سے حاصل کی۔
سنہ 1955ء میں انہوں نے آیت اللہ سید محمد ہادی میلانی کے درسِ خارج میں شرکت شروع کی۔
حوزه علمیه نجف
سنہ 1957ء میں وہ نجف اشرف گئے، جہاں انہوں نے حوزۂ علمیہ نجف کے نامور اساتذہ جیسے آیت اللہ سید محسن حکیم، سید ابوالقاسم خوئی، سید محمود شاہرودی، مرزا باقر زنجانی اور مرزا حسن بجنوردی کے دروس میں شرکت کی۔ تاہم، ان والد اس بات پر راضی نهیں تھے که وه نجف اشرف میں مزید قیام کریں لهذا آپ مشہد واپس آگئے۔
مشہد میں انہوں نے ایک سال تک آیت اللہ میلانی کے دروس سے استفادہ کیا۔ بعد ازاں سنہ 1958ء میں مزید علمی ترقی اور دینی تعلیم کے شوق میں وہ حوزۂ علمیہ قم تشریف لے گئے۔ اسی سال قم روانگی سے قبل آیت اللہ محمد ہادی میلانی نے انہیں اجازتِ روایت بھی عطا کی۔
حوزه علمیه قم
قم میں سید علی خامنہ ای نے عظیم علمی شخصیات جیسے آیت الله سید حسین بروجردی، امام خمینیؒ، حاج شیخ مرتضیٰ حائری یزدی، سید محمد محقق داماد اور علامہ طباطبائی جیسے اساتذہ سے کسبِ فیض کیا۔
قم میں اپنے قیام کے دوران انہوں نے زیادہ تر وقت تحقیق، مطالعہ اور تدریس میں صرف کیا۔
مشهد واپسی
سنہ 1964ء میں اپنے والد محترم کی بینائی کے مسائل کے باعث ان کی خدمت اور مدد کے لیے انہیں دوبارہ مشہد واپس آنا پڑا۔ مشہد واپسی کے بعد انہوں نے ایک مرتبہ پھر آیت اللہ میلانی کے دروس میں شرکت کی، جو سنہ 1970ء تک جاری رہی۔
مشہد پہنچتے ہی انہوں نے “رسائل”، “مکاسب” اور “کفایہ” جیسی کتب کی بنیاد پر فقہ و اصول کے اعلیٰ دروس کی تدریس شروع کر دی۔ اس کے علاوہ انہوں نے عوام کے لیے تفسیرِ قرآن کے دروس بھی منعقد کیے۔ ان دروس میں نوجوانوں، خصوصاً طلبہ کی بڑی تعداد شریک ہوتی تھی۔
درس تفسیر
اپنے دروسِ تفسیر میں آیت اللہ خامنہ ای قرآنِ مجید کی آیات کی روشنی میں اسلامی فکر و فلسفے کے بنیادی اصول بیان کرتے تھے۔ وہ ان دروس میں انقلابی جدوجہد اور طاغوتی نظام کے خاتمے کی ضرورت پر اس قدر زور دیتے تھے کہ ان کے شاگرد اور سامعین اس نتیجے پر پہنچتے کہ ملک میں اسلامی تعلیمات پر مبنی حکومت قائم ہونی چاہیے۔
ان دروسِ تفسیر کے انعقاد کا ایک اہم مقصد اسلامی انقلاب کے اصولوں اور افکار کو معاشرے تک پہنچانا بھی تھا۔ سنہ 1968ء میں انہوں نے علماء و طلاب کے لیے اعلیٰ سطح کے دروسِ تفسیر کا آغاز کیا، جو 1987ء تک جاری رہے، البتہ ایرانشہر میں گرفتاری اور جلاوطنی کے دوران یہ سلسلہ کچھ عرصے کے لیے متاثر ہوا۔
ان کے دروسِ تفسیر ان کے دورِ صدارت کے بعد بھی جاری رہے۔
درس خارج
سنہ 1990ء میں انہوں نے درسِ خارج کی تدریس کا آغاز کیا، اور اس کے بعد سے وہ جہاد، قصاص، مکاسب اور نمازِ مسافر جیسے موضوعات پر فقہی دروس دیتے رہے ہیں۔
ادبی شخصیت
آیت اللہ خامنہ ای شاعری اور ادب سے گہری واقفیت رکھتے ہیں اور انہیں ہمیشہ ناولوں اور افسانوی ادب کے مطالعے سے خاص دلچسپی رہی ہے۔ انہوں نے دنیا بھر کے معروف ناولوں اور ادبی تخلیقات کا مطالعہ کیا ہے۔ ناولوں، عظیم ادیبوں کے ادبی آثار، اور مشرقی و مغربی اقوام کی تاریخ و ثقافت کے مطالعے کا یہ شوق آج بھی برقرار ہے۔
وہ ادبی تنقید اور شاعری سے بھی وابستہ رہے ہیں اور متعدد شعراء، ادباء اور دانشوروں سے ان قریبی تعلقات تھے۔ مشہد میں قیام کے دوران وہ ادبی نشستوں میں شرکت کرتے تھے، جہاں ممتاز شعراء موجود ہوتے تھے۔ ان محفلوں میں وہ شاعری پر تنقیدی گفتگو بھی کرتے تھے۔
آیت اللہ خامنہای نے اپنی پہلی نظم سنہ 1955ء یا 1956ء میں کہی اور حالیہ برسوں میں انہوں نے “امین” تخلص استعمال کیا ہے۔ ایک طویل عرصے تک ان کے پاس دو نوٹ بکس رہتی تھیں۔ ایک میں وہ منتخب غزلیں اور دوسری میں خوبصورت اشعار درج کیا کرتے تھے۔
تاریخی کتابوں کا مطالعہ بھی ان کی علمی و فکری سرگرمیوں کا ایک اہم حصہ رہا ہے، اور انہیں معاصر تاریخ کے مختلف موضوعات اور مباحث پر گہری دسترس حاصل ہے۔
عربی زبان سے دلچسپی
آیت الله خامنه ای کے نانا ایک فاضل عالم اور عربی زبان جاننے والے تھے۔ ان کی والدہ سنِ بلوغ سے پہلے تک نجف میں ایسے گھرانے میں پرورش پاتی رہیں جہاں عربی زبان بولی جاتی تھی۔ اسی وجہ سے وہ نجف کی عام بول چال کی عربی سے بخوبی واقف تھیں۔آیت اللہ خامنہ ای کو بھی عربی زبان سے غیر معمولی دلچسپی تھی۔ اس بارے میں وہ فرماتے ہیں:
“عراقی زائرین زیارت کے لیے مشہد آتے تھے۔ وہ امام رضا کے صحن میں جمع ہوتے اور اشعار و قصائد پڑھتے تھے۔ میں گھنٹوں وہاں کھڑا رہتا، پوری توجہ اور دلجمعی کے ساتھ ان کی باتیں سنتا اور ان کے الفاظ پر غور کرتا تھا۔”
عراق کے سفر کے دوران وہ کوشش کرتے تھے کہ صرف عربی میں گفتگو کریں۔ اسی لیے وہ ہمیشہ ایسی جگہ تلاش کرتے جہاں کوئی فارسی نہ بولتا ہو۔
“میں کاظمین سے بغداد صرف اس لیے جاتا تھا تاکہ صرف عربی بول سکوں۔”
عربی ادب کی تعلیم
آیت الله خامنه ای نے عربی ادب میں اعلیٰ ترین درجے تک مہارت حاصل کی، اور خاص طور پر نحو کی کتاب مغنی اور بلاغت کی کتاب مطول سے بے حد شغف تھا۔ مطول ان کے پسندیدہ ترین دروس میں سے ایک تھی۔ ان کے اپنے الفاظ میں:
“میں اس حصے کے موضوعات کے ساتھ جیتا تھا اور میری روح اس سے معمور ہو جاتی تھی۔ آج بھی کبھی کبھی اس کے بعض اشعار گنگناتا ہوں۔”
انہوں نے تاریخ اور تاریخِ ادب کے میدان میں عربی کی بڑی انسائیکلوپیڈیا کا مطالعہ کیا اور ہر کتاب کے پشتِ جلد پر اپنے حاشیے اور تاثرات تحریر کیے۔تاہم مجموعی طور پر جدید عربی ادب ان کی دلچسپی کو پوری طرح اپنی جانب متوجہ نہ کر سکا۔ جیسا کہ وہ فرماتے ہیں:
“اس کے بعض حصوں میں مجھے ایسی چیزیں ملیں جو عربی ذوق اور عربی زبان کے منافی تھیں۔ خصوصاً اس اسلوب کا ذکر کرنا چاہیے جو یورپی ادب کے انداز اور مواد سے متاثر ہے، جو نہ عربی ادب ہے اور نہ یورپی ادب، بلکہ ایک مسخ شدہ صورت ہے جسے ہر سلیم الفطرت اور پاکیزہ ذوق رکھنے والا رد کر دیتا ہے۔”
وہ مزید فرماتے ہیں:
“میں نے معاصر مصری، شامی اور عراقی ادباء اور شعراء کے آثار پڑھے ہیں، لیکن اپنی مطلوبہ چیز مجھے عراقی شاعر محمد مهدی الجواهری کے کلام میں ملی۔”
قرآن سے دلچسپی
آیت الله خامنه ای کا قرآن سے گہرا تعلق بچپن ہی سے تھا۔ ابتدائی عمر میں اپنی والدہ کی تلاوتِ قرآن سننے کے بعد، ان کے والد نے انہیں، جب وہ ابھی پرائمری اسکول میں تھے، حاجی رمضان بنکدار کے سپرد کیا، جو مشهد کے معروف قراء میں سے تھے۔ انہوں نے اتنی تیزی سے ترقی کی کہ ان کے استاد نے آخرکار کہا:
“میرے پاس تمہیں سکھانے کے لیے اب کچھ نیا باقی نہیں رہا۔”
اس کے بعد وہ ملا عباس کے شاگرد بنے، جو مشہد کے سب سے بڑے قاری تھے اور سید محمد عرب زعفرانی کے شاگرد تھے، جنہیں مشہد میں علمِ قراءت کا بانی سمجھا جاتا ہے۔
انہی ابتدائی اسکولی برسوں میں، جب آیت الله کاشانی مشہد تشریف لائے، تو استقبالیہ تقریب میں قرآن کی تلاوت کرنے والے نوجوان سید علی خامنہ ای خود تھے۔
سن 1327 ہجری شمسی (1948–49) میں، جب ان کی عمر صرف نو سال تھی، انہوں نے آیت الله نور الدین کے استقبال کے موقع پر بھی مشهد کے خواجه اباصلت کی در گاه میں قرآن مجید کی تلاوت کی۔
مصری قراء سے آشنائی
آیت الله خامنه ای اپنی یادداشتوں میں فرماتے ہیں:
“قراء کی آوازیں سننے کے لیے ہم ‘صوت العرب’ ریڈیو اسٹیشن لگایا کرتے تھے۔ میرے پاس آج بھی ایک قرآن موجود ہے جس کے پچھلے حصے پر میں نے لکھا ہے: ‘آج مصطفی اسماعیل نے تلاوت کی’، ‘آج علی البنا نے تلاوت کی’۔ ہم بڑی مشکل سے ریڈیو قاہرہ پکڑتے تھے۔ ہمارے ایک جاننے والے مصر گئے تھے اور وہاں سے ایک دو کیسٹیں لے آئے تھے۔”
اسی انہماک کے ساتھ سننے کے ذریعے وہ راغب مصطفیٰ کی آواز سے بھی آشنا ہوئے۔ سن 1346 یا 1347 ہجری شمسی (1967–1968) کے دوران، مشهدمیں رہتے ہوئے، وہ عرب ممالک کے ریڈیو اسٹیشنز—خصوصاً ریڈیو مصر—پر شیخ مصطفی اسماعیل کی تلاوتیں تلاش کرتے تھے۔
رفتہ رفتہ سید علی خامنہ ای اور ان کے دوستوں کو قرآنی تلاوتوں کی ریکارڈنگز دستیاب ہوئیں اور وہ نئے قراء سے بھی متعارف ہوتے گئے۔
